Акафисты

Кондак 1

Первоизбранней от всего российскаго рода, славней и равноапостольней угоднице Божией Ольге составим похвалу, яко заре, во тьме идолопоклонения светом веры возсиявшей и путь ко Христу всем россианом показавшей. Ты же, яко имущая дерзновение к прославльшему тя Господу, ограждай нас от всяких бед молитвами твоими, да зовем ти:
Радуйся, святая равноапостольная княгине Ольго богомудрая.
Ангелов и человеков Творец, времена и лета во Своей власти положивый и судьбы царств и народов по Своей воли управляяй, егда восхоте род российский Святым Крещением просветити, тогда, видя благое изволение сердца твоего, призва тя первее в познание Себе, да будеши всем россианом образ и наставница в христианстей вере. Сего ради восхваляем тя сице:
Радуйся, российскаго небесе утренняя звездо, от Первозваннаго Апостола на горах Киевских предвозвещенная; радуйся, заре, во мраце неведения светло возблиставшая.
Радуйся, добрая лозо винограда Христова, от дивия* языческаго корене прозябшая; радуйся, пречудная леторасле, из неяже велие правоверия древо на земли нашей возрасте.
Радуйся, первоучительнице и просветительнице наша; радуйся, яко тобою познахом поклонятися в Троице Творцу.
Радуйся, яко тебе ради Пресвятое Имя Господне от всех россиан прославляется; радуйся, яко и твое преславное имя вкупе с равноапостольным Владимиром во всех пределех мира восхваляется.
Радуйся, страны нашея Российския духовное сокровище; радуйся, всея Христовы Церкве преславное украшение.
Радуйся, градов Киева и Пскова изрядная доброто; радуйся, людем нашим на враги благая помощнице.
Радуйся, святая равноапостольная княгине Ольго богомудрая.
Видяще тя, святая Ольго, яко крин в тернии прозябший: ты бо аще и в роде язычестем рождена еси, обаче закон Божий в сердце твоем написан всегда имела еси и целомудрие твое яко зеницу ока блюла еси; благодарно поем дивному во святых Своих Богу: Аллилуиа.
Разумом твоим вся добре ведящи, познала еси, богомудрая Ольго, яко идоли, рукама человеческима сотвореннии, не суть бози; темже, отвергши тыя, потщалася еси познати Бога истиннаго. Сего ради, похваляюще сицевое твое благоразумие, вопием ти сице:
Радуйся, добрая жено, первее всех заблуждение россиян познавшая и тщету идолопоклонения разумевшая; радуйся, истиннаго богопознания и правыя веры усердно искавшая.
Радуйся, еще не ведущи истиннаго Бога, якоже Корнилий сотник, добрыми делы Тому угождавшая; радуйся, прежде разумения закона Божия по закону совести праведно жившая.
Радуйся, прежде приятия христианския веры дела, христианом подобающая, творившая; радуйся, премудростию от Бога одаренная.
Радуйся, державу твою от нашествия супостат мужественно защитившая; радуйся, в подчиненных ти людех суды праведныя творившая.
Радуйся, царственною славою на земли и на Небеси почтенная; радуйся, яко равноапостольная от Бога прославленная.
Радуйся, святая равноапостольная княгине Ольго богомудрая.
Силою благодати Божией движима, потщалася еси, богомудрая Ольго, достигнути Царьграда, идеже зрящи красоту церковнаго благолепия и послушающи учения словес Божественных, распалалася еси всем сердцем твоим в любовь Христову, благодарственно вопиющи Ему: Аллилуиа.
Имущи сердце яко добрую землю, удобь восприяла еси, Ольго, семя святыя веры, познавши Христа Бога истиннаго. Темже и крещение святое прияла еси от руку патриарха Царьграда, иже и предрече ти, яко отныне блажити тя имут российстии сынове. Исполнити убо хотяще проречение сие, взываем ти сице:
Радуйся, тму идолослужения оставльшая; радуйся, свет богопознания взыскавшая.
Радуйся, безконечныя пагубы верою избежавшая; радуйся, жизнь вечную во Христе стяжавшая.
Радуйся, в купели святаго крещения от скверны греховныя омывшаяся; радуйся, благодатию Святаго Духа духовно родившаяся.
Радуйся, разумная горлице, от когтей душепагубнаго врана излетевшая; радуйся, под криле Орла Небеснаго прилетевшая.
Радуйся, множество душ крещением с собою ко Христу приведшая; радуйся, сего ради сугубое воздаяние от Бога получившая.
Радуйся, с верою несумненною приходящих светом от честных твоих мощей осиявающая; радуйся, душам и телесем тех, яже на пользу, подавающая.
Радуйся, святая равноапостольная княгине Ольго богомудрая.
Како не дивимся благоразумию твоему, Ольго преблаженная, ибо ты предложение царя еллинов о браце с ним разумно отвергла еси, рекши тому: не брака ради приидох семо и не соцарствования ради с тобою, но да уневещуся Крещением Безсмертному Жениху Христу Богу: Егоже паче всего возлюби душа моя и Емуже отныне во веки не престану воспевати: Аллилуиа.
Слышавши от крестившаго тя патриарха напутственное слово о чистоте, посте, молитве и о всех добродетелех, христианом подобающих, слагала еси сия в сердцы твоем, делы вся та исполняти обещавающи. Темже убо по долгу воспеваем ти сице:
Радуйся, усердная слышательнице словес Божественных; радуйся, ревностная исполнительнице закона христианскаго.
Радуйся, ниву сердца твоего очистившая от терния душевредных страстей; радуйся, слезами покаяния оросившая ю.
Радуйся, яко семя слова Божия в сердцы твоем, яко на земли добрей, укоренися; радуйся, яко семя сие прозябе и сторичный плод благих дел принесе.
Радуйся, вдовственную твою чистоту непорочно сохранившая; радуйся, воздержанием и молитвою Богу угодившая.
Радуйся, милостынею Творца умилостивившая; радуйся, нищия и убогая потребами снабдившая.
Радуйся, просвещение земли Российския светом Христова учения провидевшая.
Радуйся, святая равноапостольная княгине Ольго богомудрая.
Боготканною одеждою святаго крещения облекшися и нетленною пищею Пречистаго Тела и Крове Христовы духовно укрепльшися, Ольго преблаженная, не убоялася еси потещи к неверным соотечественником твоим, предком нашим, проповедати им Единаго Истиннаго Бога, Емуже ныне вся Россиа, яко единеми усты, воспевает: Аллилуиа.
Видевши, святая Ольго, вся люди земли Российския во тме идолослужения погруженныя, усердно потщалася еси просветити тыя светом Христовы веры и сотворити я сыны дне и наследники Царствия Небеснаго. Поминающе убо сицевое твое попечение о них, благодарственно зовем ти:
Радуйся, премудрая властительнице народа российскаго; радуйся, добрая наставница ввереннаго ти стада.
Радуйся, первей христианстей царице Елене в ревности Божественней подражавшая; радуйся, и имя тоя во святем крещении приявшая.
Радуйся, честный крест Христов и святыя иконы из Царьграда во град Киев принесшая; радуйся, иереи и клирики с собою в Россию приведшая.
Радуйся, мудрыми твоими глаголы поучавшая люди оставити тму языческаго нечестия и восприяти свет христианскаго благочестия; радуйся, многия россианы светом веры Христовы просветившая.
Радуйся, начало просвещения всея земли Российския положившая; радуйся, грады российския проповеданием Христова учения огласившая.
Радуйся, первая от земли Российския лику святых причтенная.
Радуйся, святая равноапостольная княгине Ольго богомудрая.
Проповедником духоносным, Апостолом, подражавши, Ольго богомудрая, обходила еси грады и веси державы твоея, приводящи, елико мощно бе, люди к вере Христовей и научающи их воспевати Единому в Троице славимому Богу: Аллилуиа.
Утверждая в державе твоей начаток веры христианския, создала еси храмы Божии во граде Киеве и в стране рождения твоего, при реце Велицей у града Пскова. И тако начата россиане прославляти повсюду Христа Бога нашего, тебе же, просветительнице своей, похвальная воспевати:
Радуйся, яко от чистаго источника Святыя Соборныя и Апостольския Церкве чистое учение прияла еси; радуйся, яко тем нас научила еси познати Единаго истиннаго Бога.
Радуйся, идольских требищ и кумиров низложительнице; радуйся, святых Божиих храмов создательнице.
Радуйся, яко же и Первозванный Апостол, с проповедию Евангелия землю Русскую обходившая; радуйся, Великому Новуграду и прочим российским градом Христово в мир пришествие благовествовавшая.
Радуйся, на местех проповеди твоея честныя кресты водрузившая, от нихже многая знамения и чудеса, уверения ради неверных, силою Божиею содевахуся.
Радуйся, яко тобою Всеблагий Господь сыновом российским познание Свое явил есть; радуйся, яко чрез них и прочия многия народы светом веры просветил есть.
Радуйся, яко от корене твоего честнаго Господь святаго равноапостольнаго князя Владимира показал нам есть; радуйся, яко образом жития твоего святый князь Владимир подвигся прияти христианскую веру.
Радуйся, святая равноапостольная княгине Ольго богомудрая.
Хотящи избавити сына твоего Святослава от пагубы вечныя, прилежно увещевала еси его оставити почитание идолов и веровати в Бога истиннаго. Но той не внят матернему наказанию твоему и не восхоте нечестие свое пременити на благочестие. Темже, яко неверный, отчуждися жизни вечныя и не сподобися с тобою в Горнем Царствии воспевати: Аллилуиа.
Новое знамение благоволения Своего яви тебе Господь, егда, во образ Пресвятыя Троицы, три пресветлыя луча с небесе облиста на месте дубравне, ихже не точию едина ты зрела еси, но и вси сущии тамо людие видеша, и вкупе с тобою прославиша Триединаго Бога. Мы же, ведуще сбытие проречения твоего о создании на месте оном храма Живоначальныя Троицы и града, ублажаем тя сице:
Радуйся, великая Божия угоднице, дара пророчествия сподобльшаяся.
Радуйся, Трисияннаго Небеснаго света зрительнице; радуйся, всеблагия воли Божией о просвещении народа русскаго по Апостоле Андрее первая исполнительнице.
Радуйся, града Пскова начальная основательнице; радуйся, всея Российския державы заступнице и покровительнице.
Радуйся, яко изволением Божиим держава Российская ныне от моря до моря распространися; радуйся, яко вся грады и веси ея множеством храмов Божиих украсишася.
Радуйся, яко в храмех сих святители и иереи Безкровную Жертву о людех Богу приносят; радуйся, яко сонмы иночествующих по всему лицу земли Российския единодушно хвалу Святей Троице воспевают.
Радуйся, яко обитателие града Киева и Пскова сугубо тя превозносят и ублажают; радуйся, яко и вси православнии россияне с лет древних тя почитают и прославляют.
Радуйся, святая равноапостольная княгине Ольго богомудрая.
Странствия земнаго течение скончавая, тепле Господа молила еси, Ольго блаженная, да не оставит Он землю Российскую по преставлении твоем во тме неведения пребывати, но да просветит ю светом святыя веры и вся сыны российския да научит воспевати: Аллилуиа.
Вся объята бывши благодатию Божественною, достохвальная Ольго, мысленными очесы зрела еси просвещение всего народа твоего и пророчески предрекла еси, яко мнози велиции угодницы Божий, яко звезды светлыя, в земли Российстей возсияют, еже и сбыстся изволением и благодатию всемогущаго Бога. Сего ради по долгу воспеваем ти сице:
Радуйся, духовная наша мати, испросившая у Бога просвещение праотцем нашим; радуйся, яко Всеблагий Господь, зря доброту души твоея, тебе ради вся люди русския возлюби.
Радуйся, яко тя обрете Христос достоин сосуд, чрез негоже нача изливати благодать Свою земли Российстей; радуйся, яко ты предуготовала еси люди твоя к приятию веры и благодати Христовы.
Радуйся, яко прозорливо предзрела еси величие и славу державы твоея; радуйся, яко веселилася еси о предвиденном тобою благочестии сынов российских.
Радуйся, яко по проречению твоему, мнози святии от рода нашего возсияша; радуйся, дома Живоначальныя Троицы, устроительнице.
Радуйся, молитвами твоими в скорбех и напастех нас заступающая; радуйся, во обстояниих злых Отечество наше сохраняющая и от врагов избавляющая.
Радуйся, святая равноапостольная княгине Ольго богомудрая.
Всяких добродетелей исполнена бывши, Ольго блаженная, с молитвою во устех предала еси дух твой в руце Божии, Иже всели тя в Небесныя обители и первую от россиан сопричте лику равноапостольных угодник Своих. Темже испроси и нам у Господа мирную христианскую кончину, да предадим души наша в руце Христа Бога нашего, поюще Тому хвалебную песнь: Аллилуиа.
Витии многовещаннии не могут достойно восхвалити тя, Ольго богомудрая: како ты, никиим же от человек учима и увещеваема, познала еси тщету идолослужения, правыя же веры взыскала еси и, якоже равноапостольная Елена, обрела еси безценный бисер, Христа, Егоже лицезрения на Небеси наслаждаяся ныне, не забуди нас, прелестьми мира сего омрачаемых и о благах вечных забывающих, да, тобою на путь правый наставляеми, взываем ти радостно:
Радуйся, добрыми твоими делы и правым ума и сердца изволением приуготовившая себе в жилище Божественныя благодати; радуйся, яко Сам Дух Святый учитель тебе бысть к познанию Христа Сына Божия.
Радуйся, никиихже знамений и чудес видевшая и во Христа веровавшая; радуйся, таковою верою твоею многих гонителей и мучителей, видевших знамения и чудеса и не веровавших, посрамившая.
Радуйся, водительству Святаго Духа себе предавшая; радуйся, совершенную покорность воле Божией показавшая.
Радуйся, звавшему тя гласу благодати послушна явившаяся; радуйся, с единонадесятаго часа в вертограде Господнем потрудившаяся и мзду с первыми получившая.
Радуйся, яко умудри тя Господь честь царскую, богатство и славу сочетати со смирением христианским; радуйся, яко сим образом яве нам показавшая, яко блага земныя не суть препятие души боголюбивей к достижению благ Небесных.
Радуйся, добротою целомудрия и светлостию разумения прославившаяся; радуйся, крепостию веры и целомудренною чистотою жития твоего пророчества дар от Бога восприявшая.
Радуйся, святая равноапостольная княгине Ольго богомудрая.
Путь спасения сыновом российским устрояя и предсмертное прошение твое исполняя, Всеблагий Господь возрасти во внуце твоем Владимире всеянное тобою семя веры и чрез него всю землю Российскую просвети Святым Крещением. Темже убо прославляем тя, Ольго блаженная, яко первую виновницу просвещения нашего светом святыя веры, и умильно поем Христу Спасителю нашему: Аллилуиа.
Прияв Святое Крещение, внук твой Владимир, потщася изъяти из земли нетленныя мощи твоя, чуднаго благоухания исполненныя, и со святителем Леонтием и всем множеством народа постави я в церкве Пречистыя Богоматери, и оттоле начаша источатися от них цельбы всяким недугом, притекающим с верою. Сего ради восхваляем тя сице:
Радуйся, яко благодать Святаго Духа, в тя всельшаяся, подаде нетление мощем твоим и сотвори в мощех твоих цельбоподательный источник на всякия недуги; радуйся, с маловерием к ним приходящия видети я не попускавшая.
Радуйся, явлением мощей твоих младенствовавшую Церковь Российскую возвеселившая; радуйся, прославлением их внука твоего Владимира зело обрадовавшая.
Радуйся, яко и до ныне благочестивии людие земли Российския славною памятию твоею услаждаются; радуйся, яко твоим к Богу ходатайством вернии россиане многих благ от Господа сподобляются.
Радуйся, молитвами твоими о просвещении земли Российския Бога умолившая; радуйся, вскоре многим великим святым явитися на земли Российстей прорекшая.
Радуйся, святая равноапостольная княгине Ольго богомудрая.
Пение умиленное приносим ти, угоднице Божия, и смиренно тя молим: моли о нас Единаго Человеколюбца Бога, да не отвратит лица Своего от нас, недостойных, присно согрешающих и преогорчевающих благость Его, но да накажет нас зде, яко Отец чадолюбивый, онаможе, в будущем веце, да спасет и помилует, яко Судия и Мздовоздаятель праведный, да тако, избавльшеся вечнаго мучения, сподобимся с тобою в райских обителех воспевати Ему: Аллилуиа.
Трисиянным светом осияваема, со всеми святыми предстоиши ныне на Небеси Престолу Царя царствующих, Ольго всеблаженная, и оттуду, яко светозарное светило, просвещаеши всю страну Российскую, разгоняя мрак заблуждений и показуя путь к истинному просвещению к Небесному блаженству. Сего ради, прославляюще тя, глаголем:
Радуйся, луно просвещенная от незаходимаго Солнца Правды; радуйся, путеводительнице, правую стезю к вечному спасению нам показующая.
Радуйся, мощная споспешнице и укрепительнице проповедников православныя веры; радуйся, присная покровительнице благих наставников юношества и всех, благотрудящихся на пользу общую.
Радуйся, законодателей страны Российския наставнице и покровительнице; радуйся, народоправителей и начальников страны сея мудрая и добрая советоподательнице.
Радуйся, крамол и раздоров потребительнице; радуйся, всех обидимых и неправедно гонимых заступнице.
Радуйся, скорбящих скорая утешительнице; радуйся, болящих милостивая исцелительнице.
Радуйся, людем нашим помощь молитвами твоими от Бога подавающая; радуйся, всея страны Российския предстательнице и заступнице.
радуйся, святая равноапостольная княгине Ольго богомудрая.
Благодать Пресвятаго Духа испроси нам, наставнице наша, от Всещедраго Бога и Спаса нашего, вразумляющую и укрепляющую нас в деле спасения, да не безплодно будет в нас всеянное тобою семя святыя веры, но да прозябнет и плод сотворит, имже бы возмощи нам питати души наша в будущей вечней жизни, идеже вси святии воспевают Богу: Аллилуиа.
Поюще твоя многая и преславная благодеяния, явленная стране Российстей в просвещении той светом веры Христовой, благодарственная приносим ти, с любовию зовуще сицевая:
Радуйся, богоизбранная и богопрославленная самодержице земли Русския, несокрушимое ограждение ея, покров и защищение.
Радуйся, девам российским образе целомудреннаго жития; радуйся, матерем наставнице законнаго супружества и добраго чад воспитания.
Радуйся, вдовицам правило богоугоднаго жития; радуйся, всем россианом учительнице и образе всех добродетелей.
Радуйся, соучастнице на Небеси жребия проповедников веры Христовы; радуйся, сопричастнице вечнаго блаженства праведных.
Радуйся, теплая о нас пред Богом молитвеннице; радуйся, усердная о спасении нашем ходатаице.
Радуйся, в час смерти нашея о нас к Богу ходатаице; радуйся, по исходе нашем от смертнаго сего телесе помощь и утешение подающая.
Радуйся, святая равноапостольная княгине Ольго богомудрая.
О святая равноапостольная великая княгине Ольга, приими милостивно от нас хвалебное благодарение сие о всех, яже тобою воздаде Господь нам, отцем и праотцем нашим и всей державе Российстей, и моли Всеблагаго Бога умножити милость Свою на ны и на роды родов наших, утвердити ны в правоверии и благочестии, хранити же от всех напастей, бед и зол, да сподобимся с тобою, яко чада с материю, во веки воспевати Богу: Аллилуиа.
Этот кондак читается трижды, затем 1-й икос «Ангелов и человеков Творец...» и 1-й кондак «Первоизбранней от всего...».
О святая равноапостольная великая княгине Ольго, первоугоднице российская, теплая о нас пред Богом ходатаице и молитвеннице. К тебе прибегаем с верою и молимся с любовию: буди нам во всем ко благу помощница и споспешница и, якоже во временной жизни тщалася еси просветити праотцы наша светом святыя веры и наставити я творити волю Господню, тако и ныне, в небесней пребывая светлости, благоприятными твоими к Богу молитвами вспомоществуй нам в просвещении ума и сердца нашего светом Евангелия Христова, да преспеваем в вере, благочестии и любви Христове. В нищете и скорби сущия утеши, бедствующим подаждь руку помощи, обидимыя и напаствуемыя заступи, заблудшия от правыя веры и ересьми ослепленныя вразуми, и испроси нам у Всещедраго Бога вся благая и полезная в жизни временной и вечней, да тако благоугодне зде поживше, сподобимся наследия благ вечных в безконечнем Царствии Христа Бога нашего, Емуже со Отцем и Святым Духом подобает всякая слава, честь и поклонение всегда, ныне и присно и во веки веков. Аминь.
О великая угоднице Божия, богоизбранная и богопрославленная, равноапостольная великая княгине Ольго! Ты отринула еси зловерие и нечестие языческое, уверовала еси во Единаго Истиннаго Триипостаснаго Бога, и восприяла еси святое Крещение, и положила еси начало просвещению земли Российския светом веры и благочестия. Ты еси духовная родоначальница наша, ты по Христе Спасителе нашем первая виновница просвещения и спасения рода нашего. Ты еси теплая молитвенница и ходатаица о отечестве Всероссийстем, воинстве и всех людех. Сего ради смиренно молим тя: призри на немощи наша и умоли Премилосердпго Царя небеснаго, да не прогневается на ны зело, яко по немощем нашим по вся дни согрешаем, да не погубит нас со беззаконьми нашими, но да помилует и спасет нас по милости Своей, да всадит в сердца наша спасительный страх Свой, да просветит Своею благодатию ум наш, вуо еже разумети нам пути Господни, оставити стези нечестия и заблуждений, татися же во путях спасения и истины, нецклоннаго исполнения заповедей Божиих и усавов святыя Церкве. Моли, блаженная Ольго, Человеколюбца Господа, да пробавит нам великую милость Свою, да избавит нас от нашествия иноплеменных, от внутренних нестроений, мятежей и раздоров, от глада, смеротоносных болезней и от всякаго зла, да подаст нам благорастворенияе воздуха и плодоносие земли, да сохранит страну нашу от всех козней и навет вражиих, да соблюдет в судеях и правителех правду и милость, да даст пастырем ревность о спасении пасомых, всем же людем споспешение, о еже усердно службы своя исполняти, любовь между собою и единомыслие имети, на благо отечества и Святыя Церкве верне подвизатися, да возсияет свет спасительныя веры в стране нашей во всех концех ея, да обратятся к вере неверующии, да упразднятся вся ереси и расколы. Да, тако поживше в мире на земли, сподобимся с тобою вечнаго блаженства на Небеси, хваляще и превозносяще Бога во веки веков. Аминь.
Крилами богоразумия вперивши твой ум, возлетела еси превыше видимыя твари, взыскавши Бога и Творца всяческих, и, Того обретши, паки рождение крещением прияла еси, древа животнаго наслаждающися, нетленна вовеки пребываеши, Ольго приснославная.
Воспоем днесь Благодетеля всех Бога, прославльшаго в России Ольгу богомудрую: да молитвами ея подаст душам нашим грехов оставление.
Величаем тя, святая равноапостольная княгине Ольго, яко зарю утреннюю в земли нашей возсиявшую и свет веры православныя народу своему предвозвестившую.

День памяти:

27 января (н. ст.)

Слова Божия служительнице, во апостольстей проповеди первозванному Андрею и прочим Апостолом подражавшая, просветительнице Иверии и Духа Святаго цевнице, святая равноапостольная Нино, моли Христа Бога, спастися душам нашим.


Придите днесь вси, воспоим избранную от Христа равноапостольную проповедницу Божия слова, мудрую благовестницу, люди Карталинии приведшу на путь живота и истины, Богоматере ученицу, усердную заступницу и неусыпающую хранительницу нашу, Нину прехвальную.




Избранней служительнице Слова Божия и подвигом святых Апостол подражательнице, залог благословения от Божия Матере, честный Крест приявшей и во стране Иверстей водрузившей, благодарственная хваления восписуем ти, цевнице духовная, святая равноапостольная Нино. Ты же, яко имущая дерзновение ко Господу, не престай молящися избавити нас от всяких бед и скорбей, да со умилением благодарственно зовем ти: Радуйся, святая равноапостольная Нино, просветительнице Грузии.


Ангела дивна страны Иверския яви тя всея твари Создатель, обратити народы земли сея, седящия во тьме и сени смертней, от прелести идольския и призвати их во язык свят, в люди обновления. Темже мы, благодаряще Бога, прославляем тя яко просветительницу и молитвенницу нашу и прилежно зовем ти: Радуйся, пречудная избраннице Божественнаго Промысла; радуйся, дивно процветшая розго благочестиваго корене. Радуйся, сосуде благодати преизрядный; радуйся, вместилище благодатныя силы. Радуйся, Пресвятыя Девы Богородицы верная посланнице; радуйся, прехвальная Апостолом подражательнице. Радуйся, во благовестии первозванному Андрею поревновавшая; радуйся, еюже лжа идольская попрана бысть. Радуйся, еюже святая вера насадися; радуйся, еюже нам земным путь к небесем показуется. Радуйся, святая равноапостольная Нино, просветительнице Грузии.


Видяще исполнение Божественнаго о людех смотрения Отца Небеснаго, Единороднаго Его Сына и Святаго Духа, воздвигшаго пророки и Апостолы ко спасительному служению и нашего ради обращения к свету Евангельския истины избравшаго святую равноапостольную Нину, вопием к Богу: Аллилуиа.


Разум Божественный возжелевши уразумети святая Нина, не единожды испытоваше от наставницы своея Нианфоры, яже известна быша о Господе Спасителе нашем и Его святем хитоне, наученная же от нея истинными познании, восхоте поклонитися вседрагому хитону и месту подвигов святых Апостол. Мы же, благоговения к жизни святыя Нины исполненнии, прославляем ю сице: Радуйся, истины Царствия Божия уразумети имущая; радуйся, от юности Христа возлюбившая. Радуйся, от младости материю своею Сусанною благочестию наученная; радуйся, отца своего Завулона утешение. Радуйся, святителем Иувеналием в страсе Божии упасенная; радуйся, Божиим словесем обученная. Радуйся, во святем граде Иерусалиме возращенная; радуйся, течением своим к славе Божией во младости праведных удивившая. Радуйся, земным благом небесная предпочетшая. Радуйся, святая равноапостольная Нино, просветительнице Грузии.


Сила Вышняго воздвигши тя, святая Нино, любовию благочестия, желанием поклонитися хитону Господню и ревностию апостольскою, постави тя яко светильник лучезарен, да приемлющии от тебе свет Богоразумия взывают к Богу: Аллилуиа.


Имущи святая Нина непоколебимую ревность ко благоугождению Господеви, возгарашеся желанием приити во страну Иверскую и поклонитися тамо сокровенным святыням. Мы же, видяще в ней таковое святое ревнование, возопиим к ней: Радуйся, измлада суету мира презревшая; радуйся, истинную мудрость возлюбившая. Радуйся, верное сокровище Богомудрия в Божественном учении обретшая; радуйся, возлюбивших суету мира добродетельным житием превозшедшая. Радуйся, на непоколебимем камени заповедей Христовых утвердившаяся; радуйся, преданностию воле Божией Ангелы и человеки удивившая. Радуйся, постом и молитвою плоть свою духови покорившая; радуйся, любовию своею ко храму Божию томужде многи научившая. Радуйся, добротою нрава к служению апостольства уготовившаяся; радуйся, чрез добродетельное житие свое сосудом Духа Святаго соделавшаяся. Радуйся, святая равноапостольная Нино, просветительнице Грузии.


Бурею житейских страстей смущаеми, недоумеем, како достойно воспевати твое дивное мужество, святая Богоизбранная Нино, не устрашила бо ся еси исполнити хотение свое, еже шествовати о имени Христове во языческий град Рим. Пречистая же Матерь Господа нашего благоизволи дати ти честныма рукама Своима Святый Крест и призвати тя ко благовестию спасения во стране Иверстей всем хотящим взывати Богу: Аллилуиа.


Слышав святитель града Господня Иувеналий, яко Пресвятая Богородица призва тя проповедати слово Божие во жребии Ея, во стране Иверстей, и дарова ти в видении Крест, егоже ты обвила еси власы своими, нача славити Бога, спасающаго человеки, и звати тебе сице: Радуйся, благодатию Божиею приосененная; радуйся, смирением духа дерзновение ко Господу Иисусу и Пречистей Его Матери приобретшая. Радуйся, обрадованная явлением Богоматере; радуйся, пресладкая словеса от Божия Матере слышавшая. Радуйся, с Нею яко со другинею беседовавшая; радуйся, благоговейно иерусалимскою братиею почтенная. Радуйся, уготование ко просвещению нашему незаходимым светом; радуйся, свеще, Богом возжженная, во еже разгонити мрак нечестия. Радуйся, честный Крест залог твоего преуспеяния во благовестии приимшая. Радуйся, святая равноапостольная Нино, просветительнице Грузии.


Боготечною звездою явися, святая Нино, возсиявши нам изволением Пресвятыя Владычицы нашея Богородицы и просветивши нас благовестием слова Божия. Сию небесную путеводницу, сияющую славою подвигов благочестия и утешающую выну своею помощию всех нас, притекающих к ней с мольбами, ублажающе, наипаче восхвалим Бога, явившаго святую Нину ходатаицею о нас, и возопиим Ему: Аллилуиа.


Видевше Христовы невесты, яже со святою Ниною и Рипсимиею постом и молитвою спасахуся, нечестивая помышления беззаконновавшаго Диоклетиана, хотящаго Рипсимию пояти в жену себе и идолослужению научити, вся купно бежаша тайно из идольскаго града Рима во страну Арменскую; таможе преданы бяху смерти повелением язычествовавшаго царя Тиридата. Святую же Нину Господь от сетей Диоклетиана и Тиридата спасе и приведе ю благовестия ради слова Евангельскаго во Иверию. Темже и мы, радующеся сему промышлению Божию о спасении людей, восхваляем Божию посланницу, святую Нину, зовуще: Радуйся, пребыванием своим в Риме путь благовестия себе уяснившая; радуйся, несокрушимостию духа и дивным мужеством в служении слова Божия прославившаяся. Радуйся, трудный путь во Иверию безропотно во славу Божию прошедшая; радуйся, благодатию Божиею от руки Диоклетиана и Тиридата избавленная. Радуйся, сущия у гор Триалетских гласом смирения огласившая; радуйся, образом кротости мир в душах утвердившая. Радуйся, вонею благоухания словес Христовых многи облагоухавшая; радуйся, утверждение наше на пути спасения; радуйся, яко тобою сподобляемся благ вечных. Радуйся, святая равноапостольная Нино, просветительнице Грузии.


Проповедница велия показася святая Нина, трудами бо и болезньми ея во Иверии Церковь Христова насадися, мрак неведения отгнася, свет истины явися, нам же, избавленным святою Ниною от тьмы идолослужения, достойно есть взывати ко Господу: Аллилуиа.


Возсия стране Иверстей просвещение истины, егда святая Нина огласи благовестием град Урбниси, отнюдуже мнози хождаху во Грузинский стольный град Мцхет кланятися лживым богом Ормузду и Задену; сих идолов святая Нина молитвами своими сокруши и низпроверже. Темже и мы яко победительницу демонов восхвалим ю сице: Радуйся, всемогущую силу Истиннаго Бога во стране Иверстей первее показавшая; радуйся, силою Всевышняго идола Ормузда поразившая. Радуйся, гордость его мольбами своими посрамившая; радуйся, останками его безсилие злаго духа открывшая. Радуйся, демона Задена и его аггелов поправшая; радуйся, властителей тьмы отгнавшая. Радуйся, безсильное царство их разрушившая; радуйся, бесовский пламень нечестия угасившая. Радуйся, бурным дыханием и огнем небесным служение идолом низпровергшая; радуйся, ревностию своею имя Истиннаго Бога во Иверии прославившая. Радуйся, сыновом тьмы свет Евангельский показавшая. Радуйся, святая равноапостольная Нино, просветительнице Грузии.


Хотя царь Мириан со слуги своими уразумети силу Истиннаго Бога, сокрушившаго безсильныя идолы их, с недоумением глаголаше: «Что убо сие бысть, яко бози наши падоша?» Дом же вертоградаря царева со Авиафаром, иереем иудейским, дщерию его Сидониею и иными девами, благоговейно приявшими благовестие святыя Нины, познавше Господа Христа, возопиша к Богу: Аллилуиа.


Новая жизнь дадеся сыновом Иверии приятием от Нины слова истины, вси бо от нея крестишася банею водною во очищение свое от грехов и освящение и достойни соделашася приимати от Бога исцеления мольбами сея предстательницы: царь Мириан, благодатию Божиею прозрев от слепоты, Истиннаго Бога уразуме и Христа исповеда; царица Нана возста от одра болезни, отрок же их от духа злаго свободися, и вси в купели пакибытия возродишася. Сего ради вси народи, видяще таковая, по долгу прославляют память святыя Нины, воспевающе ей сице: Радуйся, неверие царя Мириана в веру обратившая; радуйся, верное того исповедание приемшая. Радуйся, томужде от слепоты исцеление подавшая; радуйся, идолом поклонение угасившая. Радуйся, свобождение от языческих заблуждений; радуйся, очищение нравов. Радуйся, избавление от искушений; радуйся, дарование благодеяний требующим. Радуйся, святая равноапостольная Нино, просветительнице Грузии.


Странное чудо показася нам от Бога, яко Той, по благосердию Своему, страну Иверию содела жребием Богоматере и, в знамение Своего благоволения обитающим в ней, от первых же дней благовествования о спасении людей посла честный хитон Господа Христа и над хитоном водрузи Живоносный Столп, от негоже и поднесь верующии получают исцеления; еще же и яви в ней дивную и преславную благовестницу, святую Нину, и Крест со драгими ея власы ко утверждению святыя Своея веры дарова. Сицевая утешения имуще, мы, земнороднии, вознесем умы и сердца своя к горнему Царствию и прославим благодеющаго нам Бога, взывающе к Нему немолчно: Аллилуиа.


Вся объята была еси ты, святая Нино, мыслию о горнем и сего ради призвала еси дольних, неведущих Спасителя всех Господа Иисуса Христа, ко общению со наследники Небеснаго Царствия, да и тии уведят величие славы единаго Истиннаго Пастыря небесе и земли и прославят Его купно с горними жительми единеми усты и единем сердцем. Темже и мы, взирающе на ревность твою о спасении нашем, со умилением зовем ти таковая: Радуйся, отверзение дверей крещения; радуйся, наше к небесем приведение. Радуйся, Святым Крещением Грузии велиею радостию святыя Ангелы исполнившая; радуйся, царя Мириана к созиданию рукотвореннаго храма Богу Истинному подвигшая. Радуйся, честный Крест от рождий лозных в нем водрузившая; радуйся, залог сей любве своея ко Христу всем чадом Святыя Церкве оставившая. Радуйся, с сонмом подвижниц своих ко Святому Крещению всех призвавшая; радуйся, сынов Иверии от купели восприявшая. Радуйся, многи в разуме просветившая. Радуйся, святая равноапостольная Нино, просветительнице Грузии.


Всякое естество Небесных Сил радовашеся, егда крещахуся сыны Иверии; един бо от небожителей во образе дивнаго человека явися и утверди чудотворный Столп над ризою Господнею, научая всех со святою Ниною воспевати Богу: Аллилуиа.


Ветии многовещаннии языки своими не возмогут изрещи тебе достойныя хвалы, равноапостольная Нино: славы бо ради Божия и спасения ближних притекла еси от Мцхета Карталинския и Кахетинския земли, идеже вся племена дол и высот, от тебе слышавша словеса Божия, прияша спасение. Мы же, исполненнии радости и благодарения за толикую любовь к нам, от всего сердца взываем ти сице: Радуйся, облечение наше багряницею Крещения; радуйся, поточе сладости, напоивый нас водою благочестия. Радуйся, предивная поборнице веры Христовы; радуйся, насаждение на земли рая небеснаго. Радуйся, свобождение наше от рабства греховнаго; радуйся, сокрушение сетей вражиих. Радуйся, посечение злочестия; радуйся, славная победо над неверием. Радуйся, потребление злых обычаев и суеверий; радуйся, сладкозвучная свирель веры. Радуйся, святая равноапостольная Нино, просветительнице Грузии.


Спасти хотящи от вечныя погибели душу свою и ближних, равноапостольная Нино, ты ревностию поревновала еси о славе Божией и подъяла еси многотрудный подвиг апостольский, темже убо и венцем апостольским украсилася еси от Господа на небесех, идеже со всеми святыми предстоящи с мольбою о нас воспеваеши Ему: Аллилуиа.


Стену нерушимую воздвиже тя Господь, святая Нино, и показа ограждением нашим от всяких бед и источником исцелений нетленное твое тело во стране Кизикийстей, в веси Бодбе, идеже просветила еси ты царицу Софию и народ ея, да вси, предстательством твоим приемлюще от Бога милости, воззовем ти сице: Радуйся, стено и покрове, не крыющийся от нашего притекания; радуйся, готовая помоще ищущим спасения и истиннаго просвещения. Радуйся, неоскудеваемый источниче благословений и милостей Божиих к почитающим тя; радуйся, защитнице наша от погибелей и напастей. Радуйся, благочестивым людем верное поможение; радуйся, истинное умирение мятущияся плоти. Радуйся, радование душ наших. Радуйся, святая равноапостольная Нино, просветительнице Грузии.


Пение всеумиленное принесла еси Пресвятей Троице, святая Нино, умом и делом до конца своея жизни Триединаго Бога возлюбивши. Приими же от прославляющих тя умиленное пение и не презри гласа нашего, к тебе бо в напастех и скорбех прибегаем по Преблагословенней Богоматери и, на твое предстательство уповающе, зовем Богу: Аллилуиа.


Светоприемная свеща, святая Нино, свет во тьме явльшая, егда преселяшеся от земли на небо, собра верныя чада своя от купели, яко отрасли новосаждения, и от них некия недужныя исцели, и предаде Богу непорочный дух свой. Видяще же блаженную ея кончину, царь Мириан и ближнии его горько плакаху и, со слезами отходныя песни поюще, взываху к ней таковая: Радуйся, небесный Ангеле во образе земнаго человека явивыйся; радуйся, невесто Христова, уневестившая Небесному Жениху Церковь Иверийскую. Радуйся, благая просветительнице наша, в подвизех дневных и нощных течение совершившая; радуйся, неустанная кормительнице, пищею Божественных словес нас питавшая. Радуйся, непорочная голубице, возлетающая от земли в небесныя обители; радуйся, яко тело твое в нетление облечеся. Радуйся, яко святыя мощи твоя благоухания исполнишася; радуйся, яко тех благоуханием мы, чада твоя, ныне наслаждаемся. Радуйся, святая равноапостольная Нино, просветительнице Грузии.


Благодать, данную ти от Бога, ведуще, по долгу празднуем всечестную память твою, святая равноапостольная Нино, и со умилением сердца притекающе ко образу твоему, честным Крестом украшенному, вседушно просим: сохрани нас в жизни сей в вере Православней и во всяком благочестии и чистоте, да и в смертном успении нашем обрящемся достойни воспевати Богу: Аллилуиа.


Поюще твое к Богу отшествие, всехвальная Нино, почитаем твой подвиг апостольства, величаем ревность по Бозе, хвалим долготерпение, славим смирение и ублажаем кончину твою, чудесы бо многими по отшествии твоем дивно прославилася еси; о нихже дивящеся, вопием ти сице: Радуйся, в сожительство Ангельских чинов и святых любезне приятая; радуйся, собору Апостольскому сопричтенная. Радуйся, с лики избранных Божиих в чертог небесный всельшаяся; радуйся, златая кадильнице, фимиам молитвы о нас Богу приносящая. Радуйся, лицезрением небесных вечное блаженство вкушающая; радуйся, с равноапостольными Константином и Еленою славимая. Радуйся, народом Грузинским и всеми православными величаемая; радуйся, чудес Христовых сокровище. Радуйся, яко от честнаго Креста, власы твоими повитаго, исцеление душ и телес получаем; радуйся, яко от святых мощей твоих благопотребную помощь обретаем. Радуйся, святая равноапостольная Нино, просветительнице Грузии.


О преславная и предивная просветительнице страны Иверския, присная молитвеннице наша пред Спасителем Богом и Его Пречистою Материю, святая равноапостольная Нино! Нынешнее приемши приношение наше, умоли Господа Богоприятным твоим ходатайством избавити нас от всякия напасти, бед и скорбей, и сподобити вечных благ на небеси, да с тобою выну взываем Богу: Аллилуиа.

(Этот кондак читается трижды, затем икос 1 и кондак 1).




О всехвальная и предивная равноапостольная Нино, воистину великое украшение Церкве Православныя и изрядная похвало народу Божию, просветившая всю страну Грузинскую Божественным учением, и подвиги апостольства врага нашего спасения победившая, трудом и молитвами насадившая зде вертоград Христов и возращшая его в плод мног! Празднующе святую память твою, к честному лику твоему притекаем и благоговейно лобызаем всехвальный дар тебе от Божия Матере, чудотворный Крест, егоже ты обвила еси драгими власы твоими, и умильно просим, яко присную предстательницу нашу: огради нас от всяких зол и скорбей, вразуми врагов Святыя Церкви Христовы и противников благочестия, охраняй твое стадо, упасенное тобою, и моли Всеблагаго Бога, Спасителя нашего, Емуже ты ныне предстоиши, да дарует православному народу нашему мир, долгоденствие и во всяком добрем начинании поспешение, и да приведет Господь нас в Небесное Свое Царствие, идеже вси святии славословят Всесвятое Его имя ныне и присно и во веки веков. Аминь.




Святая равноапостольная Нина, просветительни­ца Грузии, родилась около 280 года в городе Коластры, в Каппадокии, где было много грузин­ских поселений. Ее отец Завулон доводился родственником свято­му великомученику Георгию. Он происходил из знатного рода, от благочести­вых родителей, пользовался расположением императора Максимиана (284—305). Находясь на военной службе у императора, Завулон, как христианин, содейст­вовал освобождению пленных галлов, принявших христианство. Мать святой Нины, Сусанна, была се­строй Иерусалимского патриарха.

Двенадцати лет от роду, святая Нина пришла в Иерусалим вместе с роди­­телями, у которых была единственной дочерью. По их обоюдному согласию и по бла­гословению Патриарха Иерусалим­ского, Завулон посвятил свою жизнь служению Богу в пустынях Иорданских, Сусанна была по­ставлена диаконисой при храме Гроба Господня, а воспитание святой Нины было поручено благо­честивой старице Нианфоре. Святая Нина проявила послушание и прилежание и через два года, при по­мощи благодати Божией, твердо навык­ла исполнять правило веры и с усер­дием читала Священное Писание.

Однажды, когда она, плача, сопереживала евангелисту, описавшему распятие Хри­ста Спасителя, мысль ее остановилась на судьбе хитона Господня. На вопрос святой Нины, где пребывает Хитон Господень (сведения о нем помещены 1 октября), старица Ниан­фора поясни­ла, что нешвенный Хитон Господень, по преданию, отнесен мцхет­ским раввином Элеазаром в Иверию (Грузию), именуемую Уделом Божи­ей Матери. Сама Пречистая Дева во время Своей земной жизни была призвана апостольским жребием к просвещению Грузии, но Ангел Господень, явившись Ей, предрек, что Грузия станет Ее земным уделом впоследствии, при скончании времен, и Промысл Божий уготовал Ей апостольское служение на Афоне (также именуемом Уделом Божией Матери).

Узнав от старицы Нианфоры, что Грузия еще не просвещена светом христианства, святая Нина денно и нощно молилась Пресвятой Богородице, да сподобит ее увидеть Грузию обращенной ко Господу, и да поможет ей обрести Хитон Господень.

Царица Небесная услышала молитвы юной праведницы. Однажды, когда святая Нина почивала после долгих молитв, Пречистая Дева явилась ей во сне и, вручила крест, сплетенный из виноградной лозы, сказала: «Возьми этот крест, он будет тебе щитом и оградою против всех видимых и невидимых врагов. Иди в страну Иверскую, благовествуй там Евангелие Господа Иисуса Христа и обрящешь благодать у Него: Я же буду тебе Покровительницею».

Пробудившись, святая Нина увидела в своих руках крест (ныне хранится в особом кивоте в Тбилисском Сионском кафедральном соборе), возрадова­лась духом и. придя к своему дяде, Патриарху Иеруса­лимскому, рассказала о видении. Патриарх Иерусалимский благосло­вил юную деву на подвиг апостольского служения.

По пути в Грузию святая Нина чудесным образом избегла мученической смерти от армянского царя Тиридата, которой подверглись ее спутницы — царевна Рипсимия, ее наставница Гаиания и 35 дев (память 30 сентября), бежавшие в Армению из Рима от гонений императора Диоклетиана (284—305). Укрепленная видениями Ангела Господня, явившегося в первый раз с кадилом, а во второй – со свитком в руке, святая Нина продолжила свой путь и явилась в Грузию в 319 году. Слава о ней вскоре распростра­нилась в окрестностях Мцхета, где она подви­залась, ибо проповедь ее сопровож­далась многими знамениями. В день преславного Преображения Господня, по молитве святой Нины, во время языческого жертвоприношения, совершаемого жрецами в присутствии царя Мириана и многочисленного народа, были низверг­нуты с высокой горы идолы - Армаз, Гаци и Гаим. Это явление сопровождалось сильной бурей.

Войдя в Мцхет, древнюю столицу Грузии, святая Нина нашла приют в семье бездетного царского садовника, жена которого, Анастасия, по молитвам святой Нины, разрешилась от неплодства и уверовала во Христа.

Святая Нина исцелила от тяжкого недуга грузинскую царицу Нану, которая, приняв святое Крещение, из идолопоклонницы стала ревностной христианкой (память ее совершается 1 октября). Несмотря на чудесное исцеление супруги, царь Мириан (265—342), внимая наущениям язычников, готов был подвергнуть святую Нину жестоким мучениям. «В то самое время, как вымышляли казнь святой праведнице, померкло солнце и непроницаемая мгла покрыла место, где находился царь.» Царь внезапно ослеп, а пораженная ужасом свита начала умолять своих язы­ческих идолов о возвращении дневного света. «Но Армаз, Заден, Гаим и Гаци были глухи, и мрак умно­жался. Тогда устрашенные единогласно воззвали к Богу, Которого пропо­ведовала Нина. Мгновенно рассеялся мрак, и солнце осветило все своими лучами.» Это событие совершилось 6 мая 319 года.

И царь Мириан, исцеленный святой Ниной от слепоты, принял святое Крещение вместе со своей свитой. По прошествии нескольких лет, в 324 году, христианство окончательно утвердилось в Грузии.

Летописи повествуют, что святой Нине, по ее молитвам, было открыто, где сокрыт Хитон Господень, и там был воздвигнут пер­вый в Грузии христианский храм (вначале деревянный, ныне каменный собор в честь 12-ти святых Апостолов, Светицховели).

К тому времени с помощью византийского императора Константина (306—337), приславшего по просьбе царя Мириана в Грузию Антиохийского епископа Евстафия, двух священников и трех диаконов, христианство окончательно упрочилось в стране. Однако, гор­ные об­ласти Грузии оставались непросвещенными. В сопровождении пре­свитера Иако­ва и одного диакона святая Нина отправилась к верховьям рек Арагви и Иори, где проповедовала Евангелие язычникам-горцам. Многие из них уверовали во Христа и приняли святое Крещение. Оттуда святая Нина прошла в Кахетию (Восточная Грузия) и поселилась в селении Бодбе, в маленькой палатке на склоне горы. Здесь она вела подвижническую жизнь, пребывая в пос­тоянных молитвах, обращая ко Христу окрестных жителей. В их числе была и царица Кахетии Соджа (София), принявшая Крещение вместе со своими царедворцами и множеством народа.

Совершив свое апостольское служение в Грузии, святая Нина была извещена свыше о близкой кончине. В послании к царю Мириану она попросила его прислать епископа Иоанна, чтобы он приуготовил ее в последний путь. Не толь­ко епископ Иоанн, но и сам царь, вместе со всем духовенством, отравился в Бодбе, где у смертного одра святой Нины они были свидетелями многих исцелений. Назидая народ, пришедший ей поклониться, святая Нина по прось­бе своих учениц, рассказала о своем происхождении и жизни. Этот рассказ, за­пи­санный Соломией Уджармской, послужил основанием жития святой Нины.

Благоговейно приобщившись Святых Таин, святая Нина завещала, чтобы ее тело погребли в Бодбе, и мирно отошла ко Господу в 335 году (по другим ис­точ­­никам, в 347, на 67-м году от рождения, после 35 лет апостольских подвигов).

Царь, духовенство и народ, скорбя о кончине святой Нины, хотели перенести ее останки в соборную Мцхетскую церковь, но не могли сдвинуть гроба подвижницы с избранного ею места упокоения. На этом месте в 342 году царь Мириан основал, а сын его царь Бакур (342—364) завершил и освятил храм во имя сродника святой Нины, святого великомученика Георгия; позднее здесь был основан жен­ский монастырь во имя святой Нины. Мощи святой, по пове­лению ее сокрытые под спудом, были прославлены многими исцелениями и чудесами. Грузинская Православная Церковь, с согласия Антиохийского Патри­ар­хата, наименовала просвети­тельницу Грузии равноапостольной и, причислив к лику святых, установила ее память 14 января (ст. ст.), в день ее блаженной кончины.



По благословению

Архиепископа Херсонского и Таврического Иоанна